KAUTAMANE WULAN SYA’BAN

         السلا م عليكم ورحمة الله وبركا ته

اَلْحَمْدُ للهِ الَّذِى اَرْسَلَ رَسُوْ لَهُ بِالْهُدَى  وَدِيْنِ الْحَقِّ لِيُظْهِرَهُ  عَلى الدِّيْنِ  كُلِّهِ وَلَوْ كَرِهَ اْلمُشْرِكُوْنَ  . اَشْهَدُ اَنْ لآ اِلهَ اِلاَّ اللهُ  وَحْدَهُ    لاَ شَرِ  يْكَ   لَهُ  . وَاَشْهَدُ اَنَّ مُحَمَّدًا عَبْدُهُ وَرَسُوْ لُهُ  . اَللّهُمَّ صَلِّ وَسَلِّمْ وَبَارِكْ عَلى سَيِدِنَا مُحَمَّدٍ وَعَلى الِهِ وَصَحْبِهِ  اَجْمَعِيْنَ  اِلى يَوْمِ الدِّيْنِ ( اَمَّا بَعْدُ )   فَيَا عِبَا دَاللهِ   اُوْصِيْكُمْ وَنَفْسِى  بِتَّقْوَى  اللهِ  .  اِتَّقُوا اللهَ حَقَّ تُقَا تِهِ  وَلاَ تَمُوْ تُنَّ اِلاَّ وَاَنْتُمْ مُسْلِمُوْنَ

Para sedherek Muslimin ingkang minulya.

Mangga kita  tansah ningkataken taqwa  dumateng Allah wonten ing sedaya wekdal lan kawontenan.Tegesipun tansah nindakaken dhawuhipun Allah sarta nebihi sedayo awisanipun.Sebab Kita sami yakin bilih kanthi taqwa dateng Allah gesang kita badhe dipun ridlani , badhe pikantuk keslametan ingkang sejati wiwit donya ngantos  akhiratipun.

Jamaah Jum’at  rahimakumullah,

Dadosaken kawigatosan bilih antawisipun tandha-tandha (ayat-ayat) engkang dipun dadosaken Gusti Allah Ingkang Maha Luhur saha Maha Peparing, kangge pangajaran dumateng tiyang-tiyang ingkang winasis sarta lantip pamikiranipun injih menika ngaweruhi kaweruh wilangan tahun sarta petung-petungan, kados dene ingkang sampun dipun ngendikaaken  Alah SWT :

هُوَ الَّذِي جَعَلَ الشَّمْسَ ضِيَاءً وَالْقَمَرَ نُورًا وَقَدَّرَهُ مَنَازِلَ لِتَعْلَمُوا عَدَدَ السِّنِينَ وَالْحِسَابَ مَا خَلَقَ اللَّهُ ذَلِكَ إِلَّا بِالْحَقِّ يُفَصِّلُ الْآيَاتِ لِقَوْمٍ يَعْلَمُونَ. إِنَّ فِي اخْتِلَافِ اللَّيْلِ وَالنَّهَارِ وَمَا خَلَقَ اللَّهُ فِي السَّمَاوَاتِ وَالْأَرْضِ لَآيَاتٍ لِقَوْمٍ يَتَّقُونَ

Artosipun :

“Panjenengane (Gusti Allah) kang ndadekake srengenge mawa sinar lan rembulan ngemu cahya lan netepake manzilh-manzilah (panggonan mubenge dhewe-dhewe) tumrap lakune rembulan iku, supaya sira kabeh weruh marang etungan taun lan etungan (wektu). Gusti Allah ora nyiptakake kang mengkono iku kajaba kanthi haq. Lan panjenengane nudhuhake tandha-tandha (keagungan-E) marang wong-wong kang ngerti. Sejatine ana ing gilir gantine wengi lan rina lan ana ing perkara kang diciptakake Gusti Allah ing langit lan ing bumi, bener-bener ana tanda-tanda (kekuwasaan-E) tumrap wong-wong kang padha takwa."

(QS. Yunus, 10 : 5-6)

Para sedherek, kaum muslimin ingkang minulyo.

Miderek ajaran agami Islam, salebetipun wekdal 24 jam meniko wonten wekdal-wekdal ingkang mengku kautaman. Semanten ugi salebetipun 7 dinten (setunggal minggu) sarta setunggal wulanipun ingdalem setunggal tahun.

Kangge kita para muttaqin sedaya wekdal kala wau dados tandha-tandhanipun Gusti Allah Ingkang Maha Kuwaos. Pramila kita kedah anyukuri taksih saget pepanggihan kaliyan wekdal-wekdal kala wau. Artosipun , sampun ngantos wonten wekdal ingkang gothang sangking tumindak ngabekti, lan manembah. Langkung-langkung wonten salebetipun wekdal ingkang mengku kautaman  kados wulan Sya’ban meniko.Dene  Sya’ban punika sak utama-utamane wulan sak sampunipun wulan Ramadhan. Menawi Wulan Ramadhan sautama-utamanipun wulan ing dalem setunggal tahun keranten setunggal wulan muput kita umat Islam kajibahan kewajiban siyam Ramadhan lan wonten salah setunggalipun ndalu langkung utami tinimbang setunggal ewu wulan. Menawi wulan Saya’ban sautama-utamanipun wulan ing dalem setunggal tahun sasampunipun wulan Ramadhan keranten mboten wonten wulan sanesipun ingdalem setunggal tahun ingkang Rasulullah SAW. langkung kathah ngelampahi pasa sunnah kejawi wonten wulan Sya’ban meniko.

Dipun ngendikaaken dening ulama : “Lan anata sira kabeh ngaweruhi, he para menungsa. Sababe Nabi sira kabeh kang kadunungan sautama-utamane sholawat lan salam, marang sasi kang barokah kanggo ngelakoni pasa (sunnah) iki ? Kerana sak temene ingdalem sasi iki diaangkat ngamal-ngamal marang ngarsane Gusti Pangeran sira kabeh Ingkang Maha Luhur. Den criosaken sangking Usamah bin Zaid ra., ingkang ngendika : “Ingsun nate takon, “He Rasulullah, ingsun mboten mangertosi panjenengan (langkung kathah) ngelampahi pasa (sunnah) sawulan wonten wulan Sya’ban tinimbang sangking wulan-wulan sanesipun?” Rasulullah saw ngendika, “Sasi iki minangka sasi kang menungsa padha kalepyan (lali), sasi antarane Rejeb lan Ramadhan, yaiku sasi kang indalem sasi iku ngamal-ngamale menungsa den angkat marang ngarsane Gusti Pangerane alam saisine tumuli ingsun dhemen yento ngamal-ngamal ingsun diangkat lan ingsun ngelakoni pasa.” (HR. Ahmad lan Nasa’i).

Yektos nampi kabegjan saestu tiyang ingkang dipun angkat ngamale sarta piyambakipun anyekseni pituduh kaangkatipun ngamal kalawau wonten ngajengipun piyambak. Lajeng satunggalipun pitulungan (syafa’at) paring sabiyantu dumateng piyambakipun tumuju marang ngarsanipun Gusti Pangeran Ingkang Maha Luhur ingdalem katrimahipun ngamal ingkang dipun lampahi.

Para sedherek, kaum muslimin ingkang minulya.

Kosok wangsulipun , yektos temen nampi kapitunan tiyang ingkang salebetipun wulan menika taksih dhemen padhon-pinadhon lan satron-sinatron antawisipun sasami-sami ingkang ngugemi ngagem agemaning agami Islam. Mangga sami kita perhatosaken pangenget-engetipun ulama meniko :

 “Kaweruhana, he para menungsa, sak temene rina lan wengi loro-lorone iku minangka gedhong panyimpenan. Tumuli kaweruhana apa kang sira simpen ingdalem gedhong iku, kabecikan apa satron-sinatron ?”

Salajengipun :

 “Tumuli dadia sedulur ingsun sasama muslim saperangane wong kang nampa kabegjan kang padha ngrupaka mangsa-mangsa kabecikan sarta mangsa-mangsa kautamane sasi, dina, lan jam. Lan padha taqarrub (anyaketi) sira kabeh marang Gusti Pangerane dheweke kabeh kanti manut miturut marang parintah-parintahe. Muga-muga dheweke kabeh antuk kacipratane kautaman lan welas asih kang lumeber. Tumuli padha nampa kabegjan sira kabeh kelawan kabegjan kang nyelametake sangking siksa neraka.”

Para sedherek, kaum muslimin ingkang minulya.

Mekaten engkang saget kula aturaken mugi-mugi kita saget nindaaken sedaya dawuh-dawuhipun Allah SWT.

 بَارَكَ اللهُ لِيْ وَلَكُمْ فِي الْقُرْآنِ الْعَظِيْمِ، وَنَفَعَنِيْ وَإِيَّاكُمْ بِمَا فِيْهِ مِنَ اْلآيَاتِ وَالذِّكْرِ الْحَكِيْمِ. أَقُوْلُ قَوْلِيْ هذَا وَأَسْتَغْفِرُ اللهَ الْعَظِيْمَ لِيْ وَلَكُمْ وَلِسَائِرِ الْمُسْلِمِيْنَ مِنْ كُلِّ ذَنْبٍ. فَاسْتَغْفِرُوْهُ، إِنَّهُ هُوَ الْغَفُوْرُ الرَّحِيْمُ.