ASORING DERAJAT MANUNGSA

السلام عليكم ورحمة الله وبركاته

اَلْحَمْدُِللهِ رَبِّ الْعٰلَمِيْنَ حَمْدًاكَثِيْرًا طَيِّبًا مُبَارَكًا فِيْهِ كُلُّ حَالٍ الَّذِى قَدْ اَوْجَبَ مِنْ نُوْرِهِ نُوْرًابِهِ عَمَّ الْهُدَى, اَشْهَدُ اَنْ لاَ اِلٰهَ اِلااللهُ وَاَشْهَدُ اَنَّ مُحَمَّدًا عَبْدُهُ وَ رَسُوْلُهُ لَا نَبِىَّ بَعْدَهُ, اَللّٰهُمَّ صَلِّ وَسَلِّمْ عَلَى سَيِّدِنَا مُحَمَّدِ النَّبِىِّ الْكَرِيْمِ وَالرَّسُوْلِ الْعَظِيْمِ وَعَلَى اٰلِهِ وَصَحْبِهِ وَمَنْ أَحْيٰى سُنَّتَهُ اِلَى يَوْمِ الْقِيَامَةِ. فَيَآاَيُّهَالْمُسْلِمُوْنَ أُوْصِيْكُمْ وَاِيَّاىَ بِتَقْوَى اللهِ فَقَدْ فَازَالْمُتَّقُوْنَ

Kaum Muslimin Jama’ah Jum’ah Rahimakumullah

Mangga kita tansah budidaya ningkataken iman lan taqwa kita dhateng Allah, inggih punika kanthi nindakaken dhawuh-dhawuhipun Allah lan nilar saha nebihi sedaya awisanipun Allah, jalaran kanthi mekaten kita badhe pikantuk kabekjan wiwit dunya dumugining akherat samangke.

Para Sederek Ingkang Minulya

Mangga sesarengan kita sinau lan mbudidaya, inggih punika; shalat fardhunipun dipun sempunakaken, shalat sunnahipun dipun tindakaken lan shalat jamaahipun dipun giyataken. Majlis taklim dipun jumbuhaken saha dipun ngrembakaaken, masjid, langgar lan mushala dipun makmuraken. Alquran dipun kaji, dipun udari makna lan kandunganipun kangge pedoman gesang. Infaq lan shadaqahipun dipun giyataken, shilaturahimipun dipun lestantunaken, sahingga tansah rumaos andhap ashor lan prasoja, gedhe athi lan cilik ing pamrih. Meniko minangka wujud taqwa lan syukur kita dhateng Allah. Amargi taqwa mboten namung lelamisan ing lathi lan boten namung pengangen-angen, ananging iktiqad ingkang sampun manggen ing athi dipun ucapaken kanthi lisanipun lan dipun tindakaken kanthi amal ibadah.

Jama’ah Jum’ah Rohimakumullah.

Mangga kita muhasabah, ngitung-ngitung dhateng awak kita piyambak-piyambak, kanthi menggalihaken dhawuhipun Allah SWT:

‰ 

Artosipun: Lan satemene Ingsun ndadekake kanggo isine neraka Jahanam akeh-akehe sangka jin lan manungsa, dhewekw padha nduweni ati, ananging ora digunakake kanggo mahami (ayat-ayate Allah) lan dhewekw padha nduweni kuping (ananging) ora padha digunakake kanggo ngrungokake (marang ayat-ayate Allah). Dheweke kuwi kaya dene raja kaya, malah dhewekw luwih kesasar maneh. Hiya dheweke kuwi wong-wong kang padha lali. (QS. Al A’rof: 179)

Hikmah saking ayat punika:

1.     Akeh-akehe jin lan manungsa badhe mlebet ing neraka jahannam amargi mboten saged ginakaken fungsi ati, mripat lan telingan kangge ningali perkawis ingkang leres lan haq.

2.     Manungsa ingkang mboten saged angginakaken fungsi ati, mripat lan telingan dipun umpamakaken kados kewan ingon-ingon, malah langkung asor malih. Na’udzubillah.

Jama’ah Jum’ah Rohimakumullah.

Sajatosipun ngibadah dhateng Allah punika kedah dipun tindakaken kanthi istiqomah, inggih punika tansah ningkataken syukur dhateng Allah ing wekdal piyambakan punapa sareng tiyang sanes, sae ing wekdal sela punapa wekdal sumpek, sae ing wekdal sugih utawi miskin, sae ing wekdal sehat utawi sakit, sae ing wekdal nem utawi sepuh.

Tiyang Jawi mastani agama inggih punika ageman, ageman ingkang resik, syukur dipun gosok lan dipun paringi minyak wangi. Yektos badhe sekeca dipun agem tur ambetipun ingkang wangi, luwes dipun pirsani. Kanthi mekaten punika agami Islam menawi dipun tindakaken kanthi saestu yektos badhe dhatengaken kemaslahatan dhateng pribadi, keluarga lan masyarakatipun. Ngibadah ugi kedah dipun tindakaen kanthi ikhlas, inggih punika namung ngajeng-ajeng ridhanipun Gusti Allah. Ngibadah dhateng Allah ugi kedah dipun tindakaken kanthi sabar, amargi sedaya tumindak manungsa mesthi wonten godha lan rubidanipun.

Jama’ah Jum’ah Rohimakumullah.

Tiyang Islam ingkang ngibadah kanthi istiqomah, ikhlas, sabar lan tawakal, insya Allah badhe dipun paringi katentreman ing ati, rumaos pikantuk perlindungan saking Gusti Allah, piyambakipun rumaos caket dhateng Allah. Sahinga tiyang ingkang mekaten punika badhe dipun paringi kanugrahan tanpa upami, boten saget dipun etang. Sahingga tiyang punika boten badhe supe tansah ngunjukaken raos syukur, kanthi tansah ningataken amal ibadahipun dhateng Allah. Mugi-mugi Allah tansah paring pitedah dhateng kita sedaya, lan mugi-mugi Gusti Allah kersa bikak manah dhateng kawulanipun ingkang dereng insaf.

بَارَكَ اللهُ لِيْ وَلَكُمْ فِى الْقُرْآنِ الْعَظِيْمِ وَنَفَعَنِى وَاِيَّا كُمْ بِمَا فِيْهِ مِنَ الْاٰيَاتِ وَالذِّكْرِالْحَكِيْمِ. أَقُوْلُ قَوْلِى هٰذَا وَأَسْتَغْفِرُ اللهَ تَعَالَى لِىْ وَلَكُمْ, فَاسْتَغْفِرُوْهُ إِنَّهُ هُوَ الْغَفُوْرُ الرَّحِيْمُ, وَقُلْ رَّبِّ اغْفِرْ وَارْحَمْ وَأَنْتَ خَيْرُ الرَّاحِمِيْنَ.